阿叔見到有作者寫美職聯真係好意外，同時亦都好欣喜，始終足球世界係百花齊放，唔同聯賽嘅規劃同管理、場內場外嘅文化、領隊同球員之間嘅背景或者諗法、足球風格嘅塑造等等，都有好多值得鑽研嘅地方。由於疫情關係，今年世界各地嘅比賽日程都有好大嘅轉變，但變相亦都令大家有機會接觸唔同嘅聯賽。至於講到美職聯嘅 MLS is back tournament，阿叔由淘汰賽嘅十六強比賽開始跟進，總共睇咗十場賽事。當然，比賽水平同歐洲主流聯賽仲有一大段距離，當中大多數球隊嘅防守都麻麻地，除咗由荷蘭名將史譚 (Jaap Stam) 帶領嘅FC辛辛那提比較囤重兵喺防守之外，其餘大部分球隊喺由攻轉守上嘅轉換都有頗多問題出現，而三線之間亦都唔算好緊密，所以難免美職聯會係屬於一個入波偏多嘅聯賽。轉眼間，聽朝就會進行決賽，奧蘭多城同波特蘭伐木者喺淘汰賽嘅發揮都有一定嘅說服力，前者固然有蘭尼 (Nani) 「孭飛」，但本身攻守對辦，係一支幾平均嘅球隊，至於後者中前場就有兩個好波之人施巴斯坦白蘭高 (Sebastián Blanco) 同華拿利 (Diego Valeri) 在陣，二人穿針引線同策動攻勢嘅能力都相當有睇頭，球隊嘅建構亦都好合理，聽朝呢場決賽相信會幾勢均力敵，阿叔就稍稍看好後者！
轉自 @早起的鳥兒看美職 Good Morning MLS
==============================
球迷世界開返IG 喇，follow返我哋啦~~
https://www.instagram.com/footballfanshk/
Search